Avdullah Hoti paralajmëron valë te re të COVID-19 në Kosovë: Ja kur mbërrijnë vaksinat e para

Kryeministri në detyrë i Kosovës, Avdullah Hoti ka paralajmëruar se vendi ndodhet në prag të një vale të re ndaj COVID-19.

Hoti thotë se ka kërkuar mirëmbajtjen dhe respektimin e masave, ndërsa sa i përket procesit të vaksinimit, ai siguron se brenda muajit mars vin kontigjenti i parë prej 33 mijë dozash.

Ai shton se Kosova do të përfitojë në total 100 mijë e 800 doza të vaksinës, teksa vijojnë negociatat me prodhuesit e tjerë.

STATUSI NGA AVDULLAH HOTI
Në takim me ministrin e Shëndetësisë Zemaj, drejtorin e IKSHPK-së Ramadani dhe me drejtorin e SHSKUK-së Krasniqi biseduam për situatën epidemiologjike kundër COVID-19.
Pasi që vendi gjendet para një vale të re të shpërthimit të pandemisë Covid-19, kërkuam mirëmbajtjen e masave në fuqi dhe respektimin e plotë të tyre. Ndërkohë që, institucionet shëndetësore janë duke punuar intenzivisht për rritjen e kapaciteteve, sigurimin e barnave dhe rritjen e numrit të personelit mjekësor.
Nga shtabet komunale, policia, AVUK-u dhe Inspektoratet, kërkuam që të rrisin angazhimin për parandalimin, menaxhimin dhe kontrollin e infeksionit COVID-19 dhe në të njëjtën kohë të bëjnë respektimin rigoroz të masave në fuqi.
Po ashtu, nga të gjithë qytetarët kërkuam që të respektojnë distancën fizike, të përdorin maskat, të bëhet dezinfektimi dhe ajrosja e lokaleve, duke pamundësuar përhapjen eventuale të infeksionit dhe shmangien e përhapjes në hapësirat e mbyllura.
Sa i përket furnizimit me vaksina, gjatë këtij muaji pritet të arrij kontingjenti i parë prej 33 mijë dozave të vaksinës COVAX. Nga ky mekanizëm Kosova do të përfitoj 100 mijë e 800 doza të vaksinës anti Covid-19, ndërkohë që janë duke u zhvilluar negociata intensive edhe me prodhues të tjerë për të siguruar numrin e nevojshëm të vaksinave me qëllim të imunizimit të plotë të popullsisë.