Bisedimet në Bruksel/ Kosova nuk diskuton për reciprocitetin dhe targat

Dy vendimet e Qeverisë së Kosovës për reciprocitetin në dokumente dhe targat ilegale nuk do të diskutohen në takimin e 18 gushtit në Bruksel, ndërmjet kryeministrit Albin Kurti dhe presidentit serb, Aleksandër Vuçiç.

Përfaqësues të qeverisë së Kosovës thonë se vendimet janë të institucioneve të Kosovës dhe të parapara edhe në marrëveshjet e kaluara të Brukselit, prandaj  nuk mund të jetë temë e diskutimit. Këtë takim e shohim me skepticizëm njohësit e procesit të dialogut.

Analisti politik Artan Muhaxheri, në një intervistë për Top Channel thotë se zhvillimet në veri të Kosovës kanë ndryshuar dinamikën e dialogut.

“Serbia është e njohur me stilin e saj që e tenton maksimumin, mirëpo dinë edhe të zmbrapset, të heq dorë, varësisht prej aleatëve. Unë nuk besoj se Serbia do të mund t’i bëjë ballë këtij presioni, mirëpo do të tentojë që të marrë diçka tjetër, apo zhvendos fokusin nga kjo marrëveshje me qëllimin që mos të shihet si një humbëse në raport me vendimin e Kosovës… Një muaj nuk është asgjë në raport me vendimin i cili pritet të hyjë në fuqi, por gjithashtu kemi një akter të ri, të cilët tashmë janë hisedar dhe në një mënyrë ambasadori e mori si një garanci edhe personale, zbatimin e kësaj marrëveshje edhe pas një muaji. Kjo nuk ka ndodhur më herët”, thekson ai.