Dialogu me Serbinë, Lauka: Deklaratat e Grenell të tepruara, Kurti punon për interesat e Kosovës
I ftuar në hapësirës së intervistës në RTV Ora ishte ish ambasadori i Shqipërisë në Kosovë, Islam Lauka.
Lidhur me marrëdhëniet Kosovë-Serbi, Lauka u shpreh se nuk ka rezultate konkrete në dialog sepse dialogu u ndërpre në momentin që u vu taksa.
Sipas tij kryeministri Kurti ka vepruar me logjikë ndërsa përsa i përket komenteve të Grenell ai u shpreh se i duken paksa të tepruara sepse taksa nuk mund të kushtëzojë marrëdhëniet me SHBA.
Ish ambasadori deklaroi se Kurti nuk është anti-amerikan dhe se punon për interesat e shtetit të Kosovës.
”Përsa i përket bisedimeve dhe rezultateve konkrete në dialog, është e vështirë të thuash që ka përparim. Nuk ka përparim sepse nuk ka dialog. Dialogu është ndërprerë në momenti kur u vu taksa. Tashmë Serbia kërkon heqjen e saj. Kjo nuk është më një kërkesë vetëm e Beogradit por edhe e SHBA. Mendoj se kryeministri Albin Kurti ka dalë me një qëllim logjik dhe racional. Kërkesa e Grenell më duket pak e tepruar. Sot jemi në një fazë kritike. Serbia vazhdon të lobojë kundër Kosovës. Kurti ka vendosur që më 15 mars të heqë pjesërisht taksën për lëndën e parë dhe më pas ta kushtëzojë me reagimin serb.Përsa i përket reciproritetit, në rast se Serbia do lejojë mallrat kosovare të futen në territoren serb me vulat e saj, atëherë taksa nuk do mbahet. Kjo më duket logjike.’ Unë e njoh Albin Kurtin dhe mendoj se është njeri me dije, bindje, është i pakorruptueshëm, i pakompromentueshëm dhe parimor. Kurti nuk është anti-amerikan. Ai vepron duke u nisur nga interesat e tanishme të shtetit të Kosovës, jo nga ajo çfarë thotë Beogradi por edhe jo nga ajo çfarë thotë partneri ynë SHBA, pa e kaluar në sitën e vet të kënvështrimit të interesave të veta. Çdo politikan që nuk i kalon në sitë këshillat e partnerit, atëherë ai nuk vepron drejtë. Sepse jo gjithmonë interesat e tua si shtet përputhen me interesat e partnetit. Orientimi gjeopolitik i Kosovës dhe Shqipërisë është drejt perëndimit, pra me SHBA dhe jo me Rusinë. Përsa i përket sanksioneve ekonomike të mundshme nga SHBA mendoj se kjo nuk ka lidhje me taksën. Nuk besoj se partneriteti i Kosovës me SHBA do minimizohet nga taksa që i është vendosur Serbisë. Në gjykimin tim edhe Grenell nuk po vepron në mënyrë konstruktive.”, tha Lauka.
