DJE PROTESTOI “KUNDËR KAPJES SË SHTETIT”, SOT HARADINAJ NË KAFE ME MUSTAFËN

“Kundër kapjes së shtetit” ishte slogani iprotestës së djeshme të organizuar në Prishtinë, iniciatorë i të cilës ish dhe kreu i Aleancës për Ardhmërinë e Kosovës Ramush Haradinaj. “Isa dhe Hashimi e kanë kapur shtetin”, shprehej dje përpara qytetarëve Haradinaj.

Megjithatë, në më pak se 24 orë gjërat duket se kanë ndryshuar shumë! Sot, kreu i AAK-së Ramush Haradinaj dhe kryeministri Isa Mustafa janë takuar në një prej hoteleve të Prishtinës, ndërsa momenti i takimit të tyre është xhiruar nga kameramani i KosovaPress-it.

Por vendi si duket nuk i pëlqeu Haradinajt, pasi tha se aty ‘po i shihnin të gjithë’.

Ndërsa punëtorët e kabinetit të kryeministrit kanë tentuar të tërheqin vëmendjen e gazetarëve dhe të kameramanëve duke thënë se ky takim nuk është asgjë përveçse një kafe. Ata, me ndihmën edhe të rojeve të sigurimit të kryeministrit arritën të largonin dhe të shtynin kameramanët dhe gazetarët nga vendi ku ndodheshin Mustafa dhe Haradinaj.