Dje u rrëzua nga Kuvendi, Qeveria i jep paradhënie pagën administratës publike! Apeli i Ministrisë së Financave të Kosovës: Shfrytëzoni bankomatet dhe mos krijoni radhë

Qeveria e Kosovës jep paradhënie pagat për punonjësit e administratës publike, për muajin mars. Ministria e Financave dhe Transfereve njofton se Thesari ka bërë procesimin e pagave për të gjithë ata që përfitojnë paga nga Buxheti i Kosovës, pra shërbyesit publik dhe civil.

“Pagat për muajin mars realizohen rreth një javë më herët, duke pasur parasysh situatën aktuale të pandemisë dhe masave që po merr Qeveria dhe Ministria e Financave dhe Transfereve për përballimin sa më të lehtë të saj.

Po ashtu, njoftojmë se me këtë pagë, përfshihet edhe pagesa e detyrimeve të prapambetura për 861 zjarrfikës përfitues nga komunat e Kosovës dhe Agjencia për Menaxhimin e Emergjencave të Ministrisë së Punëve të Brendshme dhe Administratës Publike” njofton ministria.

Me këtë rast, ministria rikujton përfituesit që përveç urdhëresave të Qeverisë të ndjekin edhe udhëzimet shtesë:

SHFRYTËZONI MAKINAT AUTOMATIKE PËR TËRHEQJE (bankomatet)

PËRDORNI KARTELAT BANKARE pa kosto shtesë (jo tërheqje të parasë së gatshme) dhe

SHTYNI TËRHEQJEN E PAGAVE për aq kohë sa mundeni, për të mos krijuar radhë të panevojshme ku rrezikohet shendeti i Juaj.

Gjithashtu, ministria njofton se sistemi bankar është mjaft likuid dhe i qendrueshëm si dhe fondet në llogaritë bankare të qytetarëve janë tërësisht të sigurta, dhe se bankomatet dhe degët e bankave janë të furnizuara mirë me para të gatshme dhe secili do të ketë mundësi të marrë shërbimet e nevojshme bankare.