Fermeri kosovar “bën xhiro” në mediat botërore; e quan ujkun Trump

Kjo është ferma e Hysni Rexhës, një qytetari nga Gjakova, i cili njihet edhe për faktin se kujdeset për një numër të konsiderueshëm kafshësh mes të cilëve, edhe të disa ujqërve. Ujkun e preferuar, ai ka vendosur ta quaj Trump, pasi siç thotë, aftësitë e tij i kujtojnë në një farë mënyrë ato të Presidentit Amerikan.

Rexha shprehet falënderues për rolin e amerikanëve gjatë luftës së Kosovës. Fermeri nga Gjakova megjithatë shpjegon se dashuria për kafshët bëri që ai të mos e braktiste shtëpinë edhe gjatë konfliktit të armatosur.

Kosova mbetet një prej vendeve më pro amerikane, ndërsa sipas një studimi të bërë nga Gallup gjatë këtij muaji, rreth 75% e qytetarëve kosovarë mbeten mbështetës të administratës Trump.

Shumë qytetarë gjithashtu i kanë quajtur djemtë e tyre Klinton, në shenjë mirënjohjeje ndaj vendimit amerikan për të zmbrapsur ofensivën serbe. Rasti i Hysni Rexhës ka bërë xhiron në mediat ndërkombëtare, ndërsa fermeri ka edhe një sërë kafshësh të tjera të veçanta për të cilat kujdeset, sikurse duket edhe nga këto pamje.