Gjilan, ambasadori Minxhozi në familjen e vëllezërve Abazi

Ambasadori i Shqipërisë në Kosovë, Qemal Minxhozi, shkoi për ngushëllim në familjen Abazi në Gjilan, e cila humbi 2 djemtë gjatë tërmetit tragjik më 26 nëntor. Pas shprehjes së ngushëllimeve të atit dhe familjarëve të tjerë, ambasada njoftoi se Minxhozi i bëri me dije vendimin e qeverisë shqiptare për ta ndihmuar familjen Abazi me shumën prej 16000 eurosh. Sipas njoftimit të ambasadës, familjarët e vlerësuan këtë akt dhe i ati i viktimave u shpreh se: ”Falënderoj qeverinë shqiptare që nuk i ndau fëmijët e mi dhe nga viktimat e tjera”. Në këtë vizitë, ambasadori u shoqërua nga kryetari i Komunës Lutfi Haziri si dhe nga anëtarë të Këshillit Komunal të Gjilanit.