Gjykata Supreme, shansi i fundit për Albin Kurtin

Paneli Zgjedhor në Kosovë ka marrë vendim këtë të martë se Albin Kurti s’mund të jetë kandidat për zgjedhjet e 14 shkurtit. Ky organ ka arsyetuar se edhe Albulena Haxhiu, Liburn Aliu, Bajram Mavriqi dhe Labinotë Demi-Murtezi nga Lëvizja Vetëvendosje nuk mund të jenë kandidatë për këto zgjedhje.

Për të hedhur më së shumti dritë rreth kësaj dinamike, i ftuar në RTV Ora, ishte avokati Tom Gashi. Ai tha se e vetmja shpresë për ta shikuar sërish Albin Kurtin kryeministër, është tek Gjykata Supreme.

“Tanimë nëse mbetet në fuqi vendimi i panelit të zgjedhur për ankesa dhe parashtresa që është bërë publik sot, nuk mund të zëvendësohen emrat e kandidatëve për zgjedhjet e 14 shkurtit. Shansi i fundit që të ndryshohet ky vendim i padrejtë, faktikisht i parapriu më herët ditë më parë, vendimi i komisionit qendror zgjedhor, është Gjykata Supreme e Republikës së Kosovës.

Ne kemi marrë sot vendimin e panelit zgjedhor, që vetëm është ndryshuar ajo që është vendosur ditë më parë nga komisioni qendror zgjedhor, është thënë që të gjithë kandidatët e tjerë janë të certifikuar, përveç 5 kandidatëve, përfshirë edhe zotin Albin Kurti, si udhëheqës i listës së VetëVendosjes. Lëvizja VetëVendosje nëse mbetet kështu do të shkojë në zgjedhje të parakohshme pa pesë kandidatë të tyre dhe pa kryetarin e tyre”, tha Gashi.

I pyetur se kur mund të mbërrijë përgjigja e Gjykatës Supreme, avokati u përgjigj:

“Afati përfundimtarë është brenda 72 orëve për shkak të afateve të tjera që janë të lidhura me zgjedhjet e 14 shkurtit. Tanimë është e gjitha në duart e Gjykatës Supreme dhe e gjitha kjo çështje ka ndodhur për shkak të vendimit shumë kontrovers të Gjykatës Kushtetuese të Kosovës që u shpall javë më parë dhe e cila, kishte si detyrë të vërtetonte vërtetimet e ankesës së Vetë Vendosjes, për votën e njërit të deputetëve që ishte vendimtare për formimin e qeverisë Hoti, por ata siç duket për shkak të trysnisë politike që kishin Kosovën e lanë në gjendje të mjerueshme.

Nëse Gjykata Supreme vendos siç ka vendosur ky panel ditën e sotme, nuk ka fare lidhje dhe janë plotësisht ligje të tjera sa i përket zgjedhjes së kryeministrit të Kosovës. Të gjithë e dini tashmë që ne së shpejti, pas 14 shkurtit do ta kemi qeverinë Kurti 2. Ai do të zgjidhet kryeministër i Kosovës, këtë nuk mund ta ndalin, janë qytetarët e Kosovës që do e vendosin këtë dhe do të jetë një numër i paditur se sa do e votojnë zotin Albin Kurtin, por ata që do të votojnë VetëVendosjen, do të votojnë dhe Albin Kurtin”, tha avokati.