Haradinaj homazhe Rugovës: Krijoi Kosovë paqësore për të gjithë!

Kryeministri i Republikës së Kosovës, Ramush Haradinaj, i pranishëm te homazhet e  ish-Presidentit të Kosovës, Ibrahim Rugova, në 13 vjetorin e vdekjes së tij, ka vlerësuar rolin e tij në historinë e vendit.

Me këtë rast, kryeministri Haradinaj, tha se sot, së bashku me kolegët e kabinetit qeveritar, kanë shkuar në nderim të veprës dhe jetës së ish-Presidentit Rugova, por njëkohësisht me respektin për traditën e të gjitha ato që institucionet e vendit i vazhdojnë për të mirën e qytetarëve, për të mirën e vendit.

Duke folur për rolin e ish-Presidentit Rugova në shtetndërtimin  e Kosovës, kryeministri Haradinaj tha se historia do ta definojë në tërësi rolin e tij, por theksoi se është vërtetë një doktrinë e një shteti paqësor të cilën ai e ka krijuar.

“Vepra e jeta e tij lidhet me një Kosovë paqësore për të gjithë”, vlerësoi kryeministri Haradinaj.