Haradinaj: Trepça do të mbështetet edhe nga opozita

Deputeti nga radhët e Aleancës për Ardhmërinë e Kosovës, Daut Haradinaj, ka paralajmëruar se nesër opozita do të përkrahë maxhorancën në Kuvend, për ligjin për ndërmarrjet publike.

Sipas KosovaPress, nesër Kuvendi do të diskutojë në seancë plenare ndryshimin e ligjit për ndërmarrjet publike, vendim ky i marrë nga Qeveria e Kosovës.

Për deputetin Haradinaj dita e nesërme padyshim që është njëra, ndoshta dhe e vetmja ditë e kësaj qeverie deri tani, që në Parlament do të sjellë një projektligj që do të ketë edhe mbështetjen e opozitës.

“Fjala është për Trepçën, që duhet t’i ndërrohet statusi dhe t’i kthehet shtetit (në ndërmarrje publike), por këtu duhet të parashtrohen tri pyetje: A do të përfshihen të gjitha asetet e Trepçës në këtë Ligj, apo vetëm miniera e Trepçës?; Kush do të jetë bartës i obligimeve në të kaluarën e Trepçës, dhe sa është kostoja e tyre? A është ky ligj për të gjitha ndërmarrjet shoqërore për t’u bartur në asete publike, apo vetëm për Trepçën?,” ka shkruar Haradinaj në Facebook