Hoxhaj përsërit: PDK nuk ka votë për Vjosën presidente, figurë përçarëse

Partia Demokratike e Kosovës mbetet e palëkundur në qëndrimin e saj për të mos votuar Vjosa Osmanin si presidente të Kosovës.

Ky qëndrim u përsërit së fundmi nga ushtruesi i detyrës së kryetarit të kësaj partie, Enver Hoxhaj.

Në një postim në facebook, Hoxhaj thotë se Partia Demokratike e Kosovës nuk ka votë për Vjosa Osmanin për presidente, pasi ajo e ka dëshmuar veten si figurë përçarëse që nuk e përfaqëson unitetin e popullit.

“Duke qenë e motivuar partiakisht dhe që përfaqëson interesat e vetëm një partie dhe liderit të saj, Osmani nuk mund të jetë aspak e denjë për pozitën e presidentes. PDK-ja nuk do ta tradhtojë besimin e votuesve të saj. Ne jemi partia e vetme në opozitë që do ta ballafaqojmë deri në fund pushtetin e ri, do t’i përfaqësojmë qytetarët e Kosovës dhe do ta mbajmë përgjegjëse për çdo premtim e vendim. PDK sikurse e kemi thënë gjatë zgjedhjeve, do të jetë fronti i vetëm politik në Kosovë kundër boshtit populist të përfaqësuar nga (Albin) Kurti”, ka shkruar Hoxhaj në Facebook.