Humor/Si i shohin shqiptarët e Kosovës plazhet në Shqipëri

Në media ka nisur që me hapjen e sezonit veror debati për cilësinë e turizmit në Shqipëri. Si çdo vit ka raportime dhe dëshmi për trajtim të diferencuar të shqiptarëve të Kosovës. Çmimet e larta janë ankesa e përhershme. Ndërkohë që këtë vit, bllokimi i hyrjes së autobusëve me targa të huaja në qendër të Durrësit i hodhi dhe më shumë benzinë zjarrit. Shumë kush e interpretoi këtë masë të Bashkisë së Durrësit si diskriminim për pushuesit nga Kosova, pasi në këtë qytet baza e turizmit janë shqiptarët e Kosovës.

Në disa mediat e Prishtinës dhe Tiranës këto ngjarje janë pasqyruar me tituj bombastikë duke e bërë situatën edhe më alarmante nga sa mund të jetë në të vërtetë.

Mjeshtri i grafikës, shqiptari nga Kosova, Gurakuq Dobruna e ka ironizuar më ketë fotomontazh atë që ndodh në plazhet shqiptare, sipas disa mediave të Prishtinës.

“Sa herë fillon sezona verore, disa portale në Kosovë, fillojnë fushatën anti-Shqipëri me qëllim apo pa qëllim. Turizmi shqiptar lë shumë për të dëshiruar, por të përmendet me mijra herë ndonjë lëshim nga një kamarier i imaxhinuar apo mangësi tjera, ta krijojnë përshtypjen që po nisemi në luftë e jo në rivierën mahnitëse të Jonit dhe Adriatikut”,- shkruan Dobruna.