Imamët e implikuar në terrorizëm

“Udha e mbarë e të fala Ridvan Haqifit”, i kishte thënë hoxhë Hajrullah Aliu, të miturit L. Rexhepi kur e kishte nisur për në luftën e Sirisë.

Mirëpo, i mituri nuk ka arritur të shkelë “tokën e Shamit” siç cilësohet Siria. Është arrestuar në tentativën për t’iu bashkuar organizatës terroriste ISIS. Një ditë më vonë është arrestuar edhe imami i xhamisë së fshatit Verbicë e Kmetovcit të Gjilanit, në cilësinë e të dyshuarit për terrorizëm, shkruan ‘Koha Ditore’.

Policia ka arrestuar edhe dy bashkëpunëtorë të Aliut, Dardan Kërqelin dhe Kastriot Halimin. Ata janë paraburgosur me nga një muaj paraburgim.

Imami i xhamisë se këtij fshati, dyshohet për veprat penale, lehtësim në kryerjen e terrorizmit, rekrutim për terrorizëm, shtytje për kryerjen e veprave terroriste.

Imami ka mohuar se ka dërguar një të mitur në Siri, ndonëse ka pranuar një pjesë të fajit se pse nuk e kishte njoftuar Policinë se po planifikohej ky udhëtim.

Imami Aliu mohon edhe akuzën se me ligjëratat e tij ka nxitur të rinjtë t’u bashkohen grupeve terroriste.

Madje, ai i është referuar një qarkoreje të Bashkësisë Islame të Kosovës që urdhëronte të gjithë imamët të mbanin ligjërata për rëndësinë e tokës së “Shamit”.