Jahjaga: Ja ku ka qenë burri im gjatë luftës

Presidentja e Kosovës, Atifete Jahjaga ka treguar në Çikago, se ku ka qëndruar bashkëshorti i saj në kohën e luftës, ku sipas saj, ai ishte refugjat në Izrael.

Përveç kësaj Jahjaga tha se Kosova me Izraelin dhe popullin hebraik, ka një lidhje të fortë e cila i bashkon.

“Kjo lidhje gjendet në paralelet e vuajtjes së pamasë dhe në historitë e dhimbshme të popujve tanë, gjatë ballafaqimit me persekutim, luftëra dhe shfarosje. Gjendet në historinë e jashtëzakonshme të shpëtimit të mijëra hebrenjve gjatë Luftës së Dytë Botërore nga shqiptarët në Kosovë, Maqedoni dhe Shqipëri”, tha ajo.

“Kjo gjendet edhe në mbështetjen të cilën populli i Kosovës e ka gjetur tek aktivistët hebraikë të cilët avokuan për përfundim të represionit dhe si refugjatë, të cilëve u është ofruar strehë në Izrael gjatë momenteve më të rënda të historisë sonë. Burri im dhe familja e tij ishin në mes të atyre njerëzve”, shtoi gjithashtu Jahjaga.

Jahjaga hapi konferencën për bashkëpunim ekonomik “Mundësitë Globale” në Çikago të SHBA-së, konferencë kjo mbi mundësitë globale të bashkëpunimit, me fokus të posaçëm në mundësitë e bashkëpunimit në fushën e biznesit në mes të Republikës së Kosovës, Shteteve të Bashkuara dhe Izraelit.