Kanuni më i fuqishëm se ligjet, 6 të vrarë brenda 7 ditëve

Kanuni ka qenë drejtësi për Shqipërinë por me ndryshimet e sistemeve, kanuni e humbi por jo plotësisht zbatimin. Jo larg nga vendi ynë, në Kosovë ende vazhdon të jetë i fortë. Mediat atje kanë raportuar shpesh për gjakmarrje dhe vrasje që lidhen me kanunin.

Sakaq bëhet me dije se numri i vrasjeve në Kosovë ka shënuar një rritje të ndjeshme nga viti i kaluar. 15 persona janë vrarë këtë vit deri në muajin korrik për dallim nga viti 2015, ku gjatë tërë vitit kishte vetëm 11 vrasje.

Vetëm në shtatë ditët e fundit vendi është tronditur me gjashtë vrasje të njëpasnjëshme. “Java e vdekjes” nisi në Ferizaj më 18 gusht, ku u vra një mashkull 20 vjeç.

Ajo vazhdoi në Gjakovë, ku në mesditën e 23 gushtit u vranë tre persona ndërsa të enjten në mbrëma në Deçan nga hakmarrja mbetën të vrarë edhe dy vëllezër. Njohësit e çështjeve të drejtësisë dhe të sigurisë kanë vlerësuar se organet e drejtësisë në Kosovë nuk janë duke funksionuar si duhet.

Sipas tyre, nga ky mosfunksionim i institucioneve në fjalë qytetarët po e marrin vetë rolin e drejtësisë, duke shuar jetë njerëzish. Mirëpo, një gjë të tillë e ka mohuar Policia e Kosovës, e cila ka thënë se punën e saj e kryen me shumë seriozitet.

Sipas Zyrës për Informim në Policinë e Kosovës, thuhet se ky institucion ka arritur që përgjatë viteve t’i zbardhë mbi 70% të rasteve. “Nëse u referohemi statistikave lidhur me zbulueshmërinë e rasteve të vrasjeve nëpër vite, Policia e Kosovës ka arritur nivelin e zbulueshmërisë së rasteve të tilla mbi 75%”, ka thënë për “Zërin” Daut Hoxha, nga Policia e Kosovës.