Kosova i dërgon Shqipërisë listën me 60 mjekë që do vaksinohen në Kukës

Kosova ka bërë gati listën e 60 mjekëve dhe infermierëve që do të vaksinohen në Shqipëri, në Kukës.

Ministria e Shëndetësisë në Kosovë, ka njoftuar se listën ia ka dërguar autoriteteve shqiptare.

Sipas njoftimit, kjo listë është hartuar nga Shërbimi Spitalor dhe Klinik Universitar i Kosovës, bazuar në gatishmërinë që ka shprehur Shqipëria për të ndihmuar dhe vaksinuar profesionistët e vijës së parë në luftën kundër Covid-19 në Kosovë.

“Ministri i Shëndetësisë së Kosovës, Armend Zemaj e ka informuar homologen e tij, ministren Ogerta Manastirliu për listën e vullnetarëve për vaksinim dhe në koordinim midis autoriteteve të dy shteteve, do ta bëhet edhe aranzhimi i aspekteve logjistike dhe vaksinimi i tyre”, thuhet në njoftimin e MSH-së.

Më herët kryetari i FSSHK-së, Blerim Syla konfirmoi se Shqipëria kishte 500 doza në dispozicion të mjekëve dhe infermierëve të Kosovës.