Kosovë/ Operacion policor në Ministrinë e Bujqësisë, ka të arrestuar

Policia e Kosovës është duke zhvilluar një aksion në Ministrinë e Bujqësisë, Pylltarisë dhe Zhvillimit Rural, saktësisht në Agjencinë për Zhvillimin e Bujqësisë.

Telegrafi mëson se në aksionin që po zhvillohet në AZHB, është arrestuar ushtruesi i detyrës së kryeshefit të Agjencisë për Zhvillimin e Bujqësisë, Agim Nuha, i cili është në këtë pozitë nga shkurti i vitit 2020.

Aksioni është duke vazhduar, ndërkaq pritet arrestimi i tetë zyrtarëve në këtë ministri.

Lajmin për Telegrafin e ka konfirmuar zëdhënësi i Policisë, Baki Kelani i cili tha:

“Mund të konfirmojmë se Policia e Kosovës është duke e realizuar një operacion policor në disa lokacione, në rajone të ndryshme. Informacione shtesë mund të jepen pas përfundimit të operacionit policor”.