Kryeparlamentari: Liberalizimi i vizave, epokë e re për Kosovën

Kryetari i Kuvendit të Kosovës, Kadri Veseli, e cilësoi sot rekomandimin e Komisionit Evropian për liberalizimin e vizave për qytetarët e Republikës së Kosovës, si një epokë të re për Kosovën.

Në një konferencë të përbashkët për shtyp me nënkryetarin e Partisë Demokratike të Kosovës dhe ish-ministrin e Jashtëm të Kosovës, Enver Hoxhaj, kryeparlamentari Veseli theksoi se “propozimi për vizat është shpërblim i merituar për popullin e Kosovës”.

Më tej, duke falenderuar ministrat e Brendshëm dhe të Jashtëm të Kosovës, ai shtoi se “kjo është një epokë e re që i jep fund izolimit ndërkombëtar të Kosovës”.

Ndërsa ish-ministri i Jashtëm, Enver Hoxhaj, tha se “është hapi i parë në rrugën tonë drejt integrimit në Evropë, si qytetarë të një shteeti të pavarur që pas 25 vitesh mund të lëvizë pa viza drejt Evropës”.