Kthehet trupi i pajetë i Fatonit në Kosovë, pritet të mësohet e vërteta nga autopsia

Në Kosovë përmes pikë kalimit kufitar Merdare, kaloi trupi i pajetë i Faton Hajrizit. Ai u vra më 19 korrik afër Lloznicës në Serbi pasi paraprakisht një ditë më parë ai dyshohet se kishte vrarë një polic serb. Përmes autopsisë nga Instituti i Mjekësisë Ligjore do të tentohet që të hidhet dritë mbi rrethanat e vdekjes së Faton Hajrizit.

Trupi i pajetë i Hajrizit vlerësohet se nuk është ruajtur në kushte të mira nga ana e autoriteteve serbe.

Vrasja e policit serb ishte cilësuar nga autoritetet serbe si e qëllimshme dhe e përgatitur nga shteti i Kosovës. Por nga ana tjetër Qeveria e kishte vlerësuar këtë retorikë si propagandë dhe iu ishte kërkuar qytetarëve që Hajrizi të mos bëhet hero.

Faton Hajrizi ishte arratisur nga burgu i Smrekonicës më 6 korrik kur po kryente dënimin për disa vepra penale për të cilat ishte shpallur fajtor.