Kufiri me Malin e Zi, Thaçi jep llogari në Kuvend

Shënimi i vijës kufitare ndërmjet shtetit të Kosovës dhe atij të Malit të Zi ka ngjallur debate të ashpra në Kuvendin e Kosovës, gjatë interpelancës së zëvendëskryeministrit Hashim Thaçi, të ftuar nga deputeti i Aleancës për Ardhmërinë e Kosovës, Ramush Haradinaj.

Kryediplomati kosovar, Hashim Thaçi, tha se përcaktimi i kufirit me Malin e Zi është në proces e sipër dhe – sipas tij, – do të bëhet në përputhje me ligjet dhe regjistrat kadastralë të Kosovës. Ai shtoi gjithashtu se Kosova, për herë të parë po vendos vetë për kufijtë shtetërorë.

Por nismëtari i interpelancës, udhëheqësi i AAK-së Ramush Haradinaj paralajmëroi Thaçin se, nëse me këtë përcaktim kufinjsh Kosova humb – siç pritet, – qindra hektarë tokë të banorëve të Rugovës, atëherë kjo gjë nuk do të tolerohet.

Akuza për pronat dhe marrëveshjet ndërshtetërore, që ka realizuar ish-qeveria e Thaçit, ka pasur edhe nga deputeti i Vetëvendosjes, Albin Kurti.

Pas debatit, përfaqësuesit e grupeve parlamentare hartuan një rezolutë të përbashkët, e cila parashikon që ekipet, të cilat punojnë për shënimin e kufirit Kosovë-Mali i Zi, të raportojnë në Kuvend për punën e bërë deri tani dhe të paraqesin hartat e detajuara, në mënyrë që deputetët të informohen para se përcaktimi i kufirit të ratifikohet në Kuvend.

Me kërkesë të zëvendëskryeministrit Hashim Thaçi, Kuvendi futi në rezolutë edhe një pikë, që mundëson nisjen e përcaktimit të kufirit edhe ndërmjet shtetit të Kosovës dhe atij të Serbisë.