Kurti kundër Haradinajt, fton që greva të vazhdojë

Lideri i Lëvizjes Vetëvendosje, Albin Kurti ka dalur në përkrahje të grevës së mësimdhënësve të arsimit, duke thënë se greva duhet të vazhdohet deri në realizimin e kërkesave dhe ta vendosin theksin te zvogëlimi i pagave të oborrit qeveritar.

Sipas Kurtit, kjo Qeveri po ngritë dhe po vlerëson vetëm pagat e shërbyesve politikë, ndërkaq po le anash ato në sektorin publik duke mos i ndryshuar fare.

Ai ka thënë se ndjen keqardhje për prindërit pasi fëmijët e tyre po humbasin mësimin, por duhet ta ngrisin zërin që të rritet cilësia e arsimit në Kosovë.

“Më e vështirë sesa situata ku të dy palët e kanë gabim, është ajo ku të dy palët kanë të drejtë. Prindërit janë të brengosur që fëmijët po u mbeten pa mësim, kurse mësimdhënësit janë të brengosur se po mbeten me paga të ulëta. Paradoksi vjen nga reduktimi i kontekstit. Kundërthënia është e rrejshme, jo pse mësimdhënësit janë edhe prindër ndërkaq edhe prindërit mësojnë fëmijët, por sepse e treta palë është e vërteta: qeveria. Ajo vlerëson shërbyesit politikë dhe jo shërbyesit publikë. Ajo don të zbusë ca varfërinë e mësimdhënësve që të mos merret me pabarazinë karshi tyre. Cila është zgjidhja? Mësimdhënësit ta vazhdojnë grevën me kusht që ta vendosin theksin te zvogëlimi i pagave të oborrit qeveritar, ndërsa prindërit ta vazhdojnë kundërshtimin me kusht që ta vendosin theksin te rritja e cilësisë në arsim”, ka thënë Kurti.

Ndërkohë, greva ka hyrë në javën e dytë dhe me sot janë humbur 7 ditë mësimi, por që është paralajmëruar se do të vazhdojë.

Ndryshe, Qeveria i ka bërë një ofertë sindikalistëve, mirëpo ata e kanë konsideruar si ofenduese pasi nuk përmbushte kërkesat e tyre.