Lugina e Preshevës do të futet në dialogun e Kosovës me Serbinë

Ndaj Kuvendit të Kosovës ka ardhur një thirrje nga Lugina e Preshevës, të cilët kanë shprehur se ata duhet të jenë të përfshirë në dialogun me Serbinë.

Liderët e Preshevës, Bujanocit dhe Medvegjës kanë bërë thirrje publike, ku theksojnë se nevoja për t’u futur në dialog lidhet me diskriminimin e vazhdueshëm që Serbia u ka bërë atyre.

Shaip Kamberi, që është kryetar i Bujanocit, ka bërë me dije se situata e përgjithshme politike në Luginën e Preshevës nuk është e kënaqshme dhe dialogu midis Kosovës dhe Serbisë është një mundësi e mirë.

“Diskriminimi sistematik dhe shtetëror i Serbisë ndaj shqiptarëve po vazhdon në Luginë të Preshevës. Procesi i dialogut, si dhe përfshirja e përfaqësuesve politik të Luginës në Grupin Negociator të Kosovës, do t’u ndihmojë shqiptarëve dhe do të shërbejë për t’i balancuar kërkesat tona dhe ti parandalojë kërkesat e shfrenuara të spektrit politik serb në Kosovë”, ka thënë ai.

Ai beson se stabiliteti në marrëdhëniet mes Kosovës dhe Serbisë do të vijë atëherë kur të rregullohet edhe çështja e diskriminimit të shqiptarëve.

Ndryshe, edhe presidenti Thaçi kishte patur takime me liderë të këtij rajoni, të cilët i kërkuar përfshirje në marrëveshjen përfundimtare në mes të Kosovës dhe Serbisë.