Lunacek për Haradinajn: E vështirë të besohet që Franca po e respekton fletë arrestin e Serbisë

Raportuesja për Kosovën në Parlamentin Europian, Ulrike Lunacek, ka thënë se Bashkimi Europian duhet të bëjë presion mbi Serbinë për të tërhequr urdhër-arrestet e vjetruara, duke shtuar se është e vështirë të besohet që Franca po e respekton flet-arrestin e Beogradit për Haradinajn.

Lunacek ka thënë se është vështirë të besohet se Franca është duke e respektuar këtë flet-arrest, duke qenë se ky vend ka njohur pavarësinë e Kosovës që më 18 shkurt të vitit 2008, një ditë pas shpalljes, transmeton Gazeta Express.

“Përveç kësaj, Franca ka raporte të shkëlqyera me Kosovën”, ka thënë Lunacek.

“Mbajtja e urdhër-arresteve të vjetruara ndërkombëtare që nga viti 2004 nga Serbia, e cila është e përfshirë në dialogun BE-Kosovë, është e papranueshme, ka thënë Lunaçek, raportuesja e Parlamentit Europian për Kosovën, duke iu referuar arrestimit të djeshëm të liderit të AAK’së, Ramush Haradinaj në Francë.

Lunacek gjithashtu u bën thirrje përfaqësuesve të lartë, si nënkryetares së BE’së, Federica Mogherini, si dhe qeverive të 28 shteteve anëtare në BE – dhe veçanërisht atyre 23 shteteve që e njohën pavarësinë e Kosovës – për të gjetur fjalë të qarta ndaj Serbisë, për të garantuar se flet-arrestet e vjetërsuara duhet të tërhiqen.

“Haradinaj, siç e dinë të gjithë, ka qenë i liruar edhe nga Tribunali Penal Ndërkombëtar i Hagës, ku u shpall dy herë i pafajshëm”, ka thënë Lunacek./GazetaExpress/