Masat kufizuese në Kosovë deri në 12 prill

Qeveria në Kosovë ka vendosur të lërë në fuqi deri në 12 prill vendimin  për ndalimin e qarkullimit të lirë të qytetarëve dhe automjeteve. Në kuadër të masave parandaluese, autoritetet bëjnë thirrje të respektohen rregullat, teksa numri I të prekurve deri më tani ka shkuar në 140.

Pas vlerësimit të situatës epidemiologjike, qeveria në Kosovë ka vendosur të lërë në fuqi deri në 12 prill vendimin  për ndalimin e qarkullimit të lirë të qytetarëve dhe automjeteve. Në një njoftim pas mbledhjes së qeverisë, ku u shqyrtuan masat për parandalimin e përhapjes së koronavirusit thuhet se:

“Vendimi obligon institucionet e Qeverisë së Republikës së Kosovës të ndërmarrin të gjitha veprimet e nevojshme për zbatimin e tij, ndërsa ky vendim i Qeverisë së Republikës së Kosovës shfuqizon vendimin Nr. 01/18 i datës 28.03.2020 i cili rregullonte zbatimin e vendimeve të lartcekura”. 

Por, gjykata Kushtetuese e ka shpallur të pavlefshëm vendimin e 23 marsit të qeverisë Kurti, pas padisë së presidentit Thaçi. Gjykata ka konstatuar se “kufizimi i të drejtave dhe lirive themelore mund të bëhet “vetëm me ligj” të Kuvendit të Republikës së Kosovës”. Vendimi hyn në fuqi më 13 prill.

Ndërkohë, në Kosovë janë shënuar 5 raste të reja me koronavirus duke e çuar në 140 numrin e të prekurve në total. Sipas të dhënave të Institutit Kombëtar të Shëndetësisë Publike, dy raste janë nga fshati Banjë i komunës së Malishevës, një nga Prishtina, një nga fshati Smrekonicë i komunës së Vushtrrisë dhe një nuk bëhet e ditur se nga cila pjesë e Kosovës. Deri tani janë kryer 1871 teste, ndërsa vetëm një pacient 82-vjeçar ka humbur jetën për shkak të covid 19. Ndërkohë mësohet se janë shëruar 7 pacientë, duke e çuar numrin total të atyre që janë rikuperuar nga sëmundja në 23.