Mimoza Kusari-Lila, në tetor prezanton partinë e re

Skenës politike në Kosovë, shumë shpejt pritet t’i shtohet edhe një parti e re.

Kryetarja e Gjakovës, Mimoza Kusari- Lila dhe deputeti i pavarur, Ilir Deda janë në etapat e përgatitjeve për prezantimin e partisë së re.

Ajo ka konfirmuar për Indeksonline se partia e re prite të zyrtarizohet gjatë muajit tetor.

Ndërsa sa i përket emrit dhe kryetarit të saj, Lila ka thënë se ende nuk është vendosur pasi janë në fazën e definimit.

“Ne dinamikën e prezantimit e kemi në muajin tetor. Jemi duke i bërë përgatitjet për regjistrimin e partisë dhe për mbajtjen e Konventës se parë, e cila do të mbahet në tetor”, ka thënë Kusari-Lila.

Partia e re sipas saj, është e hapur për të gjithë ata që besojnë se forca e re është e domosdoshme për të bërë ndryshime substanciale në Kosovë dhe mi dhënë një kahje të re zhvillimeve politike të Kosovës.

“Unë mendoj se ka hapësirë shumë të madhe për shkak se ata të cilët qe nuk votojnë sot në Kosovë përbëjnë elektorat të madh, flasim për një elektorat të fjetur, lënë anash edhe elektoratin e pakënaqur të  partive që janë në pozitë dhe opozitë. Prandaj mendoj se do të varet edhe nga ne sa arrijmë t’i afrojmë”, ka shtuar Kusari Lila.

Situata aktuale politike në vend, sipas saj, është argument shtesë se gjërat nuk po mund të lëvizin në drejtimin e duhur prandaj duhet diçka tjetër.

“Qytetarët e kanë shansin që në këtë platforme të re politike ,e cila nuk varet nga emrat e disa individëve, por do të bazohet në ideologji ta shfaqin gjithë potencialin dhe energjinë e vet për ndryshime pozitive në Kosovë”, ka theksuar ajo.