Minxhozi: Demarkacioni nuk zgjidhet me flamuj

Ambasadori i Shqipërisë në Kosovë, Qemal Minxhozi, ka kërkuar nga pushteti dhe opozita kosovare që të dialogojnë për t’i zgjidhur mosmarrëveshjet për demarkacionin e kufirit me Malin e Zi. Ai ka thënë se vendosja e flamujve nuk e zgjidh këtë problem

Ai i ka bërë thirrje pushtetit dhe opozitës kosovare që të dalin nga pozicionet që kanë dhe të dialogojnë për të gjetur një zgjidhje për çështjen e demarkacionit me Malin e Zi.

Minxhozi një intervistë për gazetën “Zëri” në Kosovë ka thënë se çështja e demarkacionit nuk zgjidhet duke vendosur flamuj, por duke dialoguar dhe ka porositur palët që të kenë më pak sherre mes vete. Sipas tij, rol të rëndësishëm në këtë çështje mund të luajë edhe shoqëria civile.

Ai është shprehur i kënaqur me shkallën e bashkëpunimit në mes të Shqipërisë dhe Kosovës, ndërsa si të arritur të rëndësishme e ka paraqitur lajmin për largimin e kontrollit të dyfishtë kufitar në mes të dyja vendeve.