Mustafa: Kurti e regjistroi videon para 2-3 ditësh e publikoi mbrëmë

Kryetari i LDK-së, Isa Mustafa ka folur para mediave pas mbledhjes së kryesisë së partisë.Mustafa ka thënë se janë pajtuar që 28 deputetët e LDK-së të votojnë për propozimet e Vetëvendosjes lidhur me seancën konstituive. Ai komentoi edhe videon e kryetarit të VV-së, Albin Kurti për të cilën tha se e ka incizuar para dy-tri ditësh por e ka publikuar mbrëmë, shkruan Gazeta Express.

Kryetari i LDK-së u shpreh po ashtu se nuk e sheh të arsyeshme që VV-ja të ketë doemos Ministrinë e Punëve të Brendshme.

“Unë nuk shoh arsye që VV të mbajë MPB-në sepse dëshiron ta luftojë korrupsionin sepse ne bashkë duhet ta luftojmë korrupsionin dhe bashkë duhet ta zhvillojmë ekonominë dhe nuk duhet të’iinstrumentalizojmë ministritë”, u shpreh Mustafa.

I pyetur nëse kanë kontaktuar me kryetarin e Lëvizjes Vetëvendosje që nga dje kur Kurti shpjegoi për arsyen e bllokimit të marrëveshjes, Mustafa tha se “nuk kanë nevojë të thërrasin Kurtin dhe ta pyesin se përse po inçizon video dy-tri ditë më herët për t’a lansuar një ditë para konstituimit të Kuvendit”

“Si po vjen me mu me bisedu e po përgatitë video dy tri ditë përpara e pastaj një natë para Kuvendit me iu drejtu popullit”, tha Mustafa.

Ai tha se së pari duhet të përmirësojmë sjelljen në dialogun mes VV-së dhe LDK-së.

“Të ulemi duke respektuar njëri tjetrin sepse Qeverinë duhet me bë vet dhe nuk vjen askush nga jashtë për të na formuar qeverinë”, deklaroi Kryetari i LDK-së.