Objekti i Millosheviçit që po ngjall konflikte në Kosovë

Kisha e ndërtuar brenda kampusit të Universitetit të Prishtinës “Hasan Prishtina”, në kohën e masave të dhunshme, ka përplasur koalicionin qeverisës në nivel qendror dhe udhëheqjen komunale të Prishtinës.

Rrënimi i këtij objekti i cili po trajtohet nga udhëheqja komunale si objekt pa leje, po kundërshtohet nga presidenti Thaçi dhe kryeministri Mustafa.

Komuna e Prishtinës po e vlerëson ndërtim pa leje, objektin e ndërtuar brenda kampusit të Universitetit të Prishtinës “Hasan Prishtina”, i destinuar për kishë ortodokse.

Kjo, pasi ky objekt ishte ndërtuar nën masat e dhunshme dhe si i tillë listohet në vargun e objekteve që duhet rrënuar. Por ky fakt ka bërë që të përplasen Lëvizja “Vetëvendosje” dhe partitë në pushtet në anën tjetër. Këta të fundit po kundërshtojnë rrëzimin e këtij objekti ortodoks, derisa Komuna nuk po lejon funksionalizimin e saj.

 Kisha është pa leje ndërtimi

Deputetja e Lëvizjes “Vetëvendosje”, Aida Dërguti, ka thënë se objekti i cili është ndërtuar brenda kampusit universitar është pa leje dhe si i tillë po trajtohet nga udhëheqja e Komunës së Prishtinës. “Pra, ai duhet të trajtohet në formën se si është, pra një objekt pa leje, për më tepër është simbol i gjenocidit të Millosheviqit, i cili e zgjon traumën kolektive të shqiptarëve sa herë e shohin atë.