Opozita, Jahjagës: Lironi të burgosurit politikë!

Presidentja e Kosovës, Atifete Jahjaga zhvilloi një takim sot me kryetarët e partive opozitare, Visar Ymerin e Vetëvendosjes, Ramush Haradinajn e AAK-së dhe Fatimr Limajn e Nismës.

Kryetari i Vetëvendosjes, Visar Ymeri, pas takimit tha se e njohëm Presidenten Jahjga me kërkesat e tona tashmë të njohura.

“Po ashtu, kërkuam edhe lirimin e të gjithë të burgosurve politikë. Pa u liruar të gjithë të burgosurit politikë dhe pa u tërhequr marrëveshjet nuk ka stabilitet në vend”, theksoi Ymeri.

Kreu i VV-së, Ymeri u shpreh se “marrëveshjet për të cilat po flasim kanë të bëjnë me politikë të jashtme, kompetencë që i takon presidentes me kushtetutë. Kësisoj presim prej saj që të ndërmarrë masa”.

Kurse Kryetari i AAK-së Ramush Haradinaj tha se me anulimin e marrëveshjeve kërkohet edhe anulimi i koncesioneve në dëm të Kosovës. “Kërkojmë anulim të marrëveshjeve, nëse jo kërkojmë referendum e nëse jo shkojmë në zgjedhje të parakohshme”.

Liderët e opozitës i dorëzuan presidentes Atifete Jahjaga dy kërkesa me shkrim, një për kërkesat e tyre për tërheqjen e marrëveshjeve, dhe tjetra për lirimin e deputetëve, që po mbahen në burg.

Ky takim është në kuadër të angazhimeve të Jahjagës për të krijuar kushtet për dialog politik mes koalicionit qeverisës dhe subjekteve politike opozitare.