Osmani Presidente e Kosovës, Haradinaj: Vota të kontrabanduara, lufta për demokraci fillon sonte

Kreu i AAK-së, Ramush Haradinaj ka komentuar zgjedhjen e Vjosa Osmanit si Preidente e Kosovës.

Haradinaj, me anë të një postimi që ka bërë në rrjetet sociale, shkruan se votat për Osmanin ishin të kontrabanduara dhe se sistemi njëpartiak dhe i kapur sapo filloi. Postimi i plotë:

“Sot pas zgjedhjes së znj. Osmani-Sadriu për Presidente të Kosovës, Aleanca qëndron faqebardhë në ruajtjen e sistemit kushtetues së demokracisë republikane. Votat e kontrabanduara në këtë proces tregojnë se Vetëvendosje dhe Guxo nuk guxojnë. Sistemi njëpartiak dhe i kapur sapo filloi. Aleanca do të jetë zë i ndërgjegjjes së popullit, shtyllë kushtetuese dhe mbrojtës i ekonomisë së tregut të lirë.”

Ai gjithashtu ka shkruar se lufta për demokraci do të fillojë që sonte dhe ka ftuar të gjithë politikanët dhe qytetarët që të mbrojnë vlerat e Kushtetutës.

“Urime deputetëve që morën pjesë duke i përfshirë edhe ata të pazarit të natës që lan parimet për përfitime të atypëratyshme. Lufta për demokraci fillon sonte. Ftoj politikanët dhe qytetarët e vullnetit të mirë të mbrojmë së bashku vlerat e Kushtetutës dhe shtetit të lindur nga gjaku i lirisë!”