Pse nuk u arrestua Albin Kurti

Duke u përgjigjur mbi pyetjen se përse Albin Kurti nuk u arrestua dje kur u paraqit në turmën e demonstruesve, ministri i Brendshëm kosovar, Skënder Hyseni, tha se është Polica ajo që vendos se kur duhet të kryhet një aksion policor për kapjen e njërit ose apo tjetrit individ.

Gjithashtu, ai shtoi se Policia kryen urdhrat e Prokurorit të Shtetit dhe jo urdhrat politikë.

“Unë nuk do të jap kurrë urdhra politikë”, tha Hyseni.
Ndërsa mbi pyetjen sesi po futet gazi lotsjellës brenda në Kuvendin e Kosovës, Hyseni u përgjigj se është më mirë të shtrohet pyetja se pse po përdoret gazi lotsjellës në Kuvend.

“Është vështirë të mbrohesh nga veprime individuale”, shtoi Hyseni duke lavdëruar gjithsesi punën e Policisë së Kosovës në dhe përreth Kuvendit.