Sherri për taksën/Haradinaj: Rama po zbaton këshillat e Lavrovit

Pas sulmit të kryeministrit Edi Rama në lidhje me taksën, i cili tha se po baltos Albin Kurtin, ish-kryeministri i Kosovës, Ramush Haradinaj i është kundërpërgjigjur. Përmes një postimi në Facebook, Haradinaj thotë se Rama po zbaton këshillat e ministrit të Jashtëm rus, Sergei Lavrov. “I kuptueshëm frustrimi i Edi Ramës ndaj meje. E di që nuk ma fal dot që ia prisha planin serbomadh. Edi Rama pas kthimit nga Moska, vepron pa humbur kohë në zbatimin e këshillave të Lavrovit”.

Reagimi i plotë

I kuptueshëm frustrimi i Edi Ramës ndaj meje. E di që nuk ma fal dot që ia prisha planin serbomadh. Edi Rama pas kthimit nga Moska, vepron pa humbur kohë në zbatimin e këshillave të Lavrovit. Uroj që Kryeministri Kurti të vazhdojë rrugën time të bllokimit të shtegut të Edi Ramës e të tjerëve për copëtimin e Kosovës dhe fuqizimin e Serbisë e Rusisë në rajonin tonë, duke mbajtur taksën deri në kontratën finale për njohje. Të tjerat janë tashmë histori.