Shpërthimi në Kosovë, një person në gjendje të rëndë

Nga shpërthimi i një rezervuari derivatesh që ka ndodhur pak minuta më parë në Miradi të Fushë Kosovës, janë lënduar katër persona.

Kështu ka bërë të ditur Policia e Kosovës. Nga katër të lënduarit, njëri është në gjendje më të rëndë.

Këtë e kanë bërë të ditur për Telegrafin zyra e informimit e Shërbimit Spitalor i Klinikës Universitare të Kosovës (SHSKUK).

“Ju konfirmojmë se për momentin ka ardhur vetëm një rast në gjendje të rëndë. Ekipi emergjent po jep maksimumin dhe është duke reanimuar”, thuhet në përgjigjen e zyrës për informim të SHSKUK.

Policia dhe zjarrfikësit kanë dalë në vendin e ngjarjes dhe kanë nisur evakuimin e personelit.

Agron Borovci nga Policia e Kosovës ka bërë të ditur se shpërthimi i rezervuarit të derivateve në Fushë-Kosovë, ka ndodhur gjatë pastrimit të tij.