Si do të votojnë personat me Covid-19 në Kosovë?

Me afrimin e zgjedhjeve të përgjithshme në Kosovë, Komisioni Qendror i Zgjedhjeve është vënë në lëvizje në mënyrë që të sigurojë mundësinë e votimit edhe për personat e infektuar me Covid-19. Për këtë qëllim janë ngritur 200 skuadra të lëvizshme që do të jenë në shërbim të personave me Covid-19 në të gjithë Kosovën, në mënyrë që edhe ata të votojnë.

Sipas zëdhënësit të KQZ-së, Valmir Elezi, kjo praktikë u ndoq fillimisht në zgjedhjet lokale të jashtëzakonshme të 29 nëntorit në Podujevë dhe Mitrovicën e Veriut. Megjithatë, ai pranon se procesi mund të jetë sfidues, për faktin se tani bëhet fjalë për 38 komuna. “Zakonisht, ekipet e lëvizshme do të përbëhen nga 4 anëtarë. Njëri prej tyre do të jetë nga ekipet shëndetësore me qëllim që të këshillojë profesionalisht anëtarët e tjerë”, thotë Elezi.

Për të realizuar sa më shpejt dhe lehtë këtë mision, KQZ do të marrë paraprakisht listat zyrtare të personave që janë me Covid-19, të cilët do të telefonohen për të konfirmuar nëse duan të votojnë, në mënyrë që skuadra e lëvizshme të shkojë në banesën e tyre. Votat e personave të infektuar llogariten si “vota me kusht”, dhe do të numërohen në Qendrën e Numërimit dhe Rezultateve pas ditës së zgjedhjeve dhe pas numërimit të votave të rregullta.