Takimi me Albin Kurtin, Basha publikon detajet: PD përherë në krah të Kosovës së shtrenjtë.

Kreu i PD-së, Lulzim Basha priti sot në një takim kreun e qeverisë së Kosovës, Albin Kurti. Në një mesazh në rrjetet sociale, Basha ka dhënë detaje mbi temat që kanë diskutuar.

“Në një takim të ngrohtë me kryeministrin e Kosovës, Albin Kurti, diskutuam për të gjitha zhvillimet e rëndësishme politike dhe rajonale. Ngritëm gjithashtu edhe çështjen kritike, se si të ndalojmë largimin e dhimbshëm të kaq shumë të rinjve nga Shqipëria dhe Kosova. E sigurova kryeministrin Kurti se Qeveria e Kosovës, institucionet e Republikës së Kosovës dhe vëllezërit e motrat tona – qytetarët e Republikës së Kosovës – mund të vazhdojnë të mbështeten tek Partia Demokratike e Shqipërisë, sot si opozitë e fortë dhe e bashkuar, dhe nesër në drejtim të vendit, për t’i ofruar çdo ndihmë dhe për të marrë çdo vendim në mbështetje të Kosovës.

Ne jemi si përherë krenarisht në krah të Kosovës tonë të shtrenjtë!”,- shkruan Basha.