Thaçi: Bota nuk gjunjëzohet para terrorizmit

Ministri i Jashtëm i Kosovës, Hashim Thaçi, ka thënë sot nga Parisi se prezenca në “Marshimin e Bardhë” përkrah liderëve botërorë tregon solidaritetin me popullin francez si dhe vendosmërinë për të mbrojtur fjalën e lirë dhe vlerat dhe të drejtat universale të njerëzimit.

“Me anën e marshimit që jam duke bërë bashkë me dhjetëra liderë botërorë dhe qindra mijëra qytetarë të Parisit, po dëshmojmë solidaritetin tonë me popullin francez si dhe vendosmërinë për të mbrojtur fjalën e lirë dhe vlerat dhe të drejtat universale të njerëzimit”, ka thënë Thaçi.

“Të mbledhur të gjithë në vendlindjen e Deklaratës së të Drejtave të Njeriut dhe Qytetarit të 1789, ne po tregojmë se bota e qytetëruar nuk heq dorë nga themelet ku mbështetet dhe nuk gjunjëzohet para terrorizmit”, shkruan Thaçi në profilin e tij në Facebook.