Thaçi kërkon unitet të shqiptarëve në Maqedoni

Pas takimeve me bartësit kryesorë të institucioneve maqedonase në Shkup, zëvendëskryeministri dhe ministri i Jashtëm, Hashim Thaçi, vazhdoi takimet në Tetovë edhe me dy liderët e subjekteve politike shqiptare në Maqedoni.

Liderin e BDI-së, Ali Ahmetin, zëvendëskryeministri Thaçi e vizitoi në spitalin e Tetovës, ku ai është shtruar pas një aksidentit të rëndë automobilistik. Fillimisht, zëvendëskryeministri Thaçi  i uroi atij shërim sa më të shpejt.  “Shëndeti i politikës shqiptare në Maqedoni, ndërlidhet drejtpërdrejtë me shëndetin e Aliut”, deklaroi Thaçi.

Në këtë takim u diskutua për zhvillimet e fundit politike në dy vendet tona dhe zëvendëskryeministri Thaçi mori përkrahjen e plotë të liderit të BDI-së për nismat dhe projektet e bashkëpunimit ndërmjet Kosovës dhe Maqedonisë.

Ndërkaq, në takimin me kryetarin e PDSH-së, Menduh Thaçin, zëvendëskryeministri i Kosovës, Hashim Thaçi, theksoi mbështetjen e Kosovës për jetësimin e plotë të marrëveshjes së Ohrit dhe nevojën e koordinimit dhe unifikimit të partive politike shqiptare për avancimin e të drejtave të shqiptarëve si popull shtet-formues i Maqedonisë.

“Tash kur Maqedonia synon të integrohet në NATO dhe BE dhe ka përqafuar vlerat universale që përfaqësojnë këto institucione ndërkombëtare, çdo lloj diskriminimi duhet të bëhet pjesë e të kaluarës dhe e ardhmja duhet të bazohet në mirëkuptimin dhe harmoninë ndëretnike”, ka theksuar zëvendëskryeministri Thaçi.

Përveç takimeve me liderët e subjekteve politike shqiptare në Tetovë, zëvendëskryeministri Thaçi mori pjesë edhe në forumin e organizuar në Universitetin e Evropës Juglindore. “Zbatimi i plotë i marrëveshjes së Ohrit është i nevojshëm edhe për shpejtimin e integrimit Euro-Atlantik të Maqedonisë, i cili është proces dobiprurës për gjithë rajonin”, ka thënë ai para shumë studentëve që ishin mbledhur për të ndjekur ligjëratën.

Gjatë ditës, zëvendëskryeministri Thaçi është takuar me presidentin e Republikës së Maqedonisë, George Ivanov, me kryeministrin Nikola Gruevski dhe ministrin e Jashtëm, Nikola Poposki.

Vizita e tij në Maqedoni, vjen vetëm pak ditë, pasi zëvendëskryeministri Thaçi zhvillojë vizita zyrtare në Shqipëri dhe Mal të Zi.