Thaçi: Njohjet e Kosovës, nuk maten me javë apo muaj

Ministri kosovar i Punëve të Jashtme, Hashim Thaçi, ka pohuar dje se njohjet që i kanë ardhur Kosovës nuk mund të ndahen në muaj dhe javë, porse ato janë 111 njohje të fuqishme.

Këto komente Thaçi i bëri në konferencën e djeshme të përbashkët të mbajtur me ministrin e Jashtëm të Maqedonisë, Nikolla Poposki, pas interesimit të gazetarëve lidhur me njohjet e pakta që i janë bërë shtetit të Kosovës prej kohës kur ai është në krye të politikës së jashtme të Kosovës.

“Kosova i ka 111 njohje, është anëtarësuar në shumë organizata ndërkombëtare, do të ketë edhe njohje të reja. Mendoj që është në një proces të konsolidimit të fuqishëm ndërkombëtar, me një mbështetje të fuqishme prej të gjithë partnerëve dhe në të njëjtën kohë është në proces të fuqizimit të subjektivitetit të vet ndërkombëtar”, është shprehur Thaçi.