Thaçi: Synojmë njohjen nga shumica e shteteve të OKB-së

Ministri i Punëve të Jashtme, Hashim Thaçi, theksoi sot se “Kosova do të vazhdojë me përpjekjet e saj praktike për të bindur pesë vendet anëtare të BE –së se njohja e pavarësisë së Kosovës është vendim i drejtë dhe me interes të stabilitetit dhe unitetit europian”.

Në një postim në rrjetin social Facebook, Thaçi tha se “dilomacia e Kosovës do të synojë dhe do të punojë që gjatë këtij mandati të arrijë njohjen nga 2/3 e shteteve anëtare të OKB-së”.

“Politika e jashtme e Kosovës do të jetë vazhdimësi dhe reflektim i politikës së brendshme, në funksion të ruajtjes së sovranitetit, integritetit territorial, rendit kushtetues, lirive dhe të drejtave të qytetarëve të Kosovës brenda dhe jashtë vendit dhe garantimit të sigurisë së saj shtetërore. Njohja ndërkombëtare e pavarësisë dhe sovranitetit të Kosovës do të jenë në fokus të diplomacisë së Kosovës, duke lobuar fuqishëm me qëllim të forcimit të pozicionit ndërkombëtar të Kosovës, për të vendosur marrëdhënie diplomatike me shumicën e shteteve anëtare të OKB-së”, u shpreh Thaçi.

Sipas tij. arritja e këtij synimi do ta fuqizojë Kosovën si një anëtar i plotë dhe i barabartë i bashkësisë ndërkombëtare, duke u bërë një kontribut i rëndësishëm për paqen, stabilitetin dhe sigurinë e rajonit.

“Diplomacia e Kosovë do të angazhohet fuqishëm për thellimin e bashkëpunimit me institucionet euroatlantike, institucionet e Bashkimit Europian dhe të NATO-s.
Diplomacia e Kosovës do të jetë e përkushtuar për normalizimin e plotë të marrëdhënieve ndërshtetërore me Serbinë dhe vazhdimin e dialogut, që do të finalizohej me njohjen ndërsjellë , e që do të mundësojë ndërtimin e paqes së qëndrueshme mes dy vendeve, duke vendosur marrëdhënie diplomatike në frymë miqësore dhe europiane”, përfundon Thaçi.