Thaçi takim me ambasadorin e SHBA: Ndajmë të njëjtat vlera

Presidenti i  Kosovës, Hashim Thaçi ka zhvilluar një takim me ambasadorin e SHBA-së, Philip S. Kosnett, me të cilin komentoi edhe temën e taksës. Gjatë takimit, Thaçi theksoi se për Kosovën është vitale miqësia me Amerikën.

“Kosova dhe Shtetet e Bashkuara të Amerikës ndajnë vlera, parime dhe synime të përbashkëta. Në këtë rast, synimi ynë i përbashkët është të ndërtojmë paqe e stabilitet të qëndrueshëm në Kosovë dhe në rajon, si parakusht për zhvillim e prosperitet të vendit tonë.

Çelës për paqen është arritja e një marrëveshjeje paqësore, gjithëpërfshirëse dhe përfundimtare në mes të Kosovës dhe Serbisë”, është shprehur Thaçi.

Presidenti dhe ambasadori Kosnett  u shpreh që është vitale të largohen të gjitha pengesat për vazhdimin e dialogut me Serbinë dhe t’i hapet rrugë marrëveshjes paqësore.

“Partneriteti dhe miqësia me Shtetet e Bashkuara të Amerikës është jetësor për Kosovën. Kosova ka arritur kaq larg falë përkrahjes së gjithanshme të Shteteve të Bashkuara”, theksoi Thaçi.