Thaçi takohet nesër me Papa Françeskun

Presidenti i Kosovës, Hashim Thaçi, ka udhëtuar për në Selinë e Shenjtë në Vatikan, ku nesër në orën 10:00 do të takohet me Papa Françeskun, në një audiencë private.

Përveç me kreun e Vatikanit,  Thaçi do të takohet edhe me Sekretarin e Shtetit, kardinalin Pietro Parolin.

“I pari i vendit do të marrë pjesë edhe në drekën e shtruar nga Presidenti i Këshillit Papnor për Familjen, kryeipeshkvi Vincenzo Paglia”, njofton Klan Kosova.

“Thaçi, vizitën  në Selinë e Shenjtë, do ta përmbyllë me  pjesëmarrjen në meshën e shenjtë, të organizuar nën patronatin e Presidentit të Kosovës për nder të shenjtërimit të Nënë Terezës”, bën të ditur kabineti i Presidentit.