Ursula von der Leyen në Kosovë:  Mesazh për stabilitet dhe integrim

Presidentja e Komisionit Evropian,  Ursula von der Leyen,  ndodhet sot në Kosovë (15 tetor 2025),  si pjesë e turit të saj në Ballkanin Perëndimor,  që përfshin gjashtë vendet e rajonit. Vizita e saj në Prishtinë përkon me një moment kyç për dialogun Kosovë–BE dhe për përshpejtimin e reformave drejt integrimit evropian.

Sipas agjendës zyrtare,  Von der Leyen do të takohet në orën 13:00 me Presidenten e Kosovës, Vjosa Osmani,  në ambientet e Presidencës. Më pas, në orën 14:05,  ajo do të zhvillojë një takim me Kryeministrin në detyrë,  Albin Kurti,  në ndërtesën e Kuvendit të Kosovës.

Vizita në Kosovë është pjesë e turit pesë-ditor të Von der Leyen në rajon,  që nisi më 13 tetor në Tiranë,  ku ajo u takua me Presidentin Bajram Begaj dhe Kryeministrin Edi Rama,  si dhe mori pjesë në Forumin e Investimeve BE–Shqipëri.

Pas Shqipërisë, ajo vizitoi Malin e Zi,  Bosnjë dhe Hercegovinën,  dhe Serbinë. Kosova është ndalesa e parafundit,  ndërsa turi mbyllet nesër (16 tetor) në Shkup. Kjo është vizita e parë e Von der Leyen në Ballkanin Perëndimor gjatë mandatit të saj të dytë si Presidente e Komisionit Evropian. Një vit më parë,  në përfundim të mandatit të saj të parë,  ajo vizitoi po të njëjtat gjashtë vende,  duke riafirmuar angazhimin e BE-së për integrimin e rajonit në strukturat evropiane.

Vizita e sotme në Prishtinë përfaqëson një sinjal të qartë për mbështetjen e BE-së ndaj Kosovës dhe për nevojën e intensifikimit të bashkëpunimit politik,  ekonomik dhe institucional në rrugën drejt anëtarësimit evropian.