Përmbytjet në Kosovë, ushtria shqiptare gati të ndërhyjë nëse situata përkeqësohet

Forcat e Armatosura shqiptare dhe mjete të ushtrisë janë vendosur në Kukës, në gatishmëri për të mbështetur banorët e disa prej komunave në Kosovë, të cilat janë prekur nga përmbytjet, si pasojë e reshjeve të dendura ditët e fundit.

Kryeministri Rama shkruan:“Trupat dhe mjetet tona të Forcave të Armatosura, për të mbështetur banorët e disa prej komunave në Kosovë, të cilat janë prekur shumë rëndë nga përmbytjet, si pasojë e reshjeve të jashtëzakonshme”.

Por edhe Ministri i Mbrojtjes, Niko Peleshi, thotë se forcat tona janë të gatshme të ndërhyjnë dhe të bashkëpunojnë me autoritetet e Kosovës, në rast të përkeqësimit të situatës.

“Forca dhe mjete nga FA janë dislokuar në Kukës, në gatishmëri për të mbështetur banorët e disa prej komunave në Kosovë, të cilat janë prekur nga përmbytjet si pasojë e reshjeve të dendura ditët e fundit. Të gatshëm të ndërhyjmë në koordinim me autoritetet e Kosovës, në rast të përkeqësimit të situatës. Me vëllezërit tanë në ditë të mira dhe të vështira”, shkruan Peleshi.