80 mijë dollarë për foton e Ramës me Obamën. Dënohet me burg miku i Bilal Shehut

Shtetasi amerikan që pagoi në emër të Edi Ramës 80 mijë dollarë për një foto më Barak Obamën në vitin 2012 u dënua me 4 muaj burg. “Zëri i Amerikës” raporton se në gjyqin e zhvilluar në SHBA, avokati i të dënuarit William Argeros, ka deklaruar se klienti i tij po vepronte në emër të kandidatit për kryeministër në Shqipëri, Edi Rama. Prokurorët amerikanë arritën të provojnë se William Argeros ia dha paratë Bilal Shehut, një shqiptaro-amerikani që ishte i ftuar në të njëjtin aktivitet ku mori dhe kryeministrin Edi Rama për të bërë foton e famshme me Obamën. Në vitin 2017, Bilal Shehu u dënua me 1 vit burg, e cila u konvertua në liri me kusht. Edhe Bilal Shehu, mik i kryeministrit Edi Rama, ka pranuar fajësinë se kishte ndihmuar në futjen e 80 mijë dollarëve në fushatën presidenciale të Presidentit Obama, duke fshehur origjinën e tyre të huaj. Ligjet amerikane ndalojnë financimet e huaja për fushatat politike amerikane dhe ky është rasti i parë kur një politikan shqiptarë faktohet se ka shkelur ligjet e SHBA. Edi Rama asnjëherë s’ka pranuar të komentojë ketë skandal, ndërkohë që në Shqipëri ka nxitur prokurorinë të padisë Lulzim Bashën për fondet e PD-së në fushatë.

Në vijim shkrimi i plotë i Zërit të Amerikës:

William Argeros që sajoi një kontribut të paligjshëm nga një i huaj në një komitet të përbashkët për mbledhjen e fondeve për presidentin Barack Obama në vitin 2012, u dënua me katër muaj heqje lirie.

Argeros kishte pranuar fajësinë në vitin 2016 për këtë çështje dhe për dëshmi të rreme para një jurie të madhe, duke u përballur me deri 24 muaj heqje lirie, në bazë të marrëveshjes së tij të pranimit të fajit.

Por gjykatësja, Madeline Cox Arleo, vuri në dukje mungesën e precedentëve paraprakë penalë të 61-vjeçarit dhe besimin se kontributi prej 80 mijë dollarësh nuk kishte për qëllim të ndikojë në zgjedhjet amerikane.

Ligji amerikan u ndalon shtetasve të huaj të japin kontribute për kandidatët federalë. Avokati John Azzarello, duke përfaqësuar zotin Argeros, tha se klienti i tij po vepronte në emër të një kandidati për postin e kryeministrit në Shqipëri, i cili dëshironte një foto të realizuar me zotin Obama.

Avokati Azzarello tha se kandidati ishte Edi Rama, i cili aktualisht është kryeministër i Shqipërisë. Kur akuzat u publikuan në vitin 2016, zyra e zotit Rama mohoi të ishte burim i kontributeve.

Zyra e prokurorit amerikan pretendonte se zoti Argeros organizoi kontributin përmes një banori nga New Jersey, Bilal Shehu, i cili u dënua me kusht në vitin 2017.

Gjykatësja Cox Arleo tha se i dha zotit Argeros një dënim më të rreptë, sepse ai pranoi të ketë gënjyer një juri të madhe.

Zoti Argeros jetonte në Tampa të Floridës, në kohën kur u ngritën akuzat. Ai gjithashtu kaloi shumë vjet në Betlehem të Pennsylvanias, ku puna e tij përfshinte shërbimin në një bord këshillimor burgu dhe mbështetjen e ri integrmit të të burgosurve, tha avokati Azzarello. Disa nga ish kolegët e tij i shkruan letra gjykatëses Cox Arleo për ta mbështetur atë.

Me lot në sy, zoti Argeros i tha gjykatëses se “ndihem i turpëruar dhe marr përsipër përgjegjësinë e plotë për çfarë kam bërë”.

Edi Rama dhe Bilal Shehu

Fotoja 80 mijë dollarë e Edi Ramës me Obamën