Dita Olimpike e Amantias, një festë e madhe sportive dhe historike

Pas atmosferës së ngrohtë të natës së parë, “Vajzëfest – Art, Film, Trashëgimi” vijoi me një tjetër mbrëmje të veçantë në Parkun Arkeologjik të Amantias, ku u zhvillua “Dita Olimpike” nën kujdesin e Komitetit Olimpik Kombëtar Shqiptar.

Qytetarë nga zona dhe më gjerë u mblodhën për të ndjekur nga afër sportistë të ndryshëm teksa ushtronin sportet e tyre, duke sjellë në skenë një shfaqje unike dhe emocionuese. Ky aktivitet u konsiderua një moment historik, pasi për herë të parë zhvillohet një show sportiv në Amantia, e cila njihet si vendlindja e sportit dhe lojërave të lashta në Shqipëri.

Atmosfera festive u pasurua më tej me shijet e gatimeve tradicionale të zonës, ku vizitorët provuan kuzhinën karakteristike të banorëve të Vajzës. Muzika polifonike dhe vallet popullore u bënë pjesë e natës, duke sjellë në skenë një kombinim të kulturës, traditës dhe energjisë rinore.

Ky edicion i Vajzëfest, i cili organizohet nga Shoqata e fshatit Vajzë në bashkëpunim me Bashkinë Selenicë, synon të promovojë trashëgiminë kulturore dhe historike të zonës, ndërsa e lidh me rrymat moderne të artit dhe sportit. Festa vijon deri më 24 gusht, me aktivitete të shumta që përfshijnë art, muzikë, film, sport dhe mikpritjen e njohur shqiptare. Një video përmbledhëse pasqyron emocionet dhe momentet më të bukura të natës së dytë në Amantia.