Kryebashkiaku i Vlorës drejt shkarkimit nga kryeministri Rama për paaftësi drejtimi

Vlora do jetë super dështimi i Ramës në zgjedhjet e ardhshme. Këtë e di mjaft mirë Edi Rama.

Qytetarët e Vlorës gjithnjë e më shumë po shfaqin pakënaqësitë e tyre për administrimin e bashkisë nga kryetari i saj Dritan Leli, por për këtë arsye i janë vënë edhe kryeministrit Edi Rama. Sms-të dhe plot email kanë vajtur te kabineti i kryeministrit për të parin e Vlorës.

Rama ishte dje në Vlorë dhe krejt papritur thërriti në një takim urgjent kryebashkiakun Leli, kryetarin e Partisë Socialiste Socialiste lokale Anduel Tahiraj dhe drejtues të institucioneve vendore. FaxNews ka arritur të mësojë detaje nga ky takim i djeshëm, zhvilluar jo vetëm pa prezencën e medias por ku as deputetët e Vlorës nuk kanë qenë të pranishëm.

Po ashtu bëhet e ditur se burime nga kupola rozë tregojnë se Rama do ta shkarkojë kryetarin Leli pasi sondazhet tregojnë se në zgjedhjet e ardhshme humbet thellë PS-ja në Vlorë çka kryeministri do t’ja faturojë Lelit humbjen.

Po ashtu mësohet se një grup përfaqësuesish të bizneseve në zonën e Zvernecit kishin tentuar të takonin kryebashkiakun Leli për ti shprehur shqetësimin e tyre se prishjet e objekteve që po planifikohet të kryhen në këtë zonë do të dëmtojnë sezonin turistik dhe ekonominë e qytetit. Refuzimi i Lelit për tu adresuar atje ku duhet këtë shqetësim ka bërë që Rama ta thërrasë mbledhjen pikërisht në Zvernec.

Rama gjatë takimit ka shprehur hapur pakënaqësitë e tij ndaj Dritan Lelit, përfshirë dhe këtë sjellje ndaj bizneseve të zonës. Pakënaqësi që në fakt janë ekspozuar edhe në vizitat e vazhdueshme të Ramës në Vlorë ku nuk kanë munguar asnjëherë kritikat publike deri edhe për paaftësinë e kryebashkiakut për të rregulluar një pusetë të thjeshtë uji në Lungomare.

Në një kohë kur shtylla kurrizore e qytetit është transformuar nga investimet e kryera nga qeveria qendrore, lagjet dhe hapësirat brenda qytetit ende vazhdojnë të jenë në gjendje të mjerueshme. Pasqyrë e cila duket se ka rritur kontrastin dhe shtuar pakënaqësitë ndaj kryebashkiakut Leli.

Rama ka qenë tepër kritik madje edhe e ka paralajmëruar Dritan Lelin se mandati i tij mund të marrë fund shumë shpejt, pa e përfunduar atë. Kujtojmë se në fakt Leli u rikonfirmua në detyrën e kryebashkiakut Qershorin e vitit 2019 në një garë pa rivalë dhe ku nuk arriti dot të grumbullojë as votat që kishte marrë në vitin 2015 kur u zgjodh për herë të parë. Shkak për këtë rezultat mësohet të jetë cilësuar jo vetëm performanca e tij e dobët në punët publike por edhe marrëdhëniet problematike me degën lokale të Partisë Socialiste.

Një tjetër shqetësim që siç duket ka ndezur sinjalin e kuq të alarmit tek Rama është pretendimi se Leli nuk përfill as Këshillin Bashkiak ndërsa shumicën e kohës ja kushton daljeve televizive dhe udhëtimeve drejt Tiranës duke qene vetvetiu larg punëve publike të përditshme me të cilat merret bashkia e që shqetësojne dhe qytetarët vlonjat.

Formati i zgjedhur nga Rama për ta zhvilluar këtë seancë llogaridhënieje me Lelin në sytë e të drejtuesve lokalë të institucioneve duket se ka synuar jo vetëm “dushin e ftohtë” ndaj Lelit por edhe bërjen e tij shembull për çdo funksionar shteti në Vlorë.

Në një kohë kur kurba e marrëdhënies mes Kryeministrit Rama dhe kryebashkiakut të Vlorës ka kapur pikën më të ulët, sfida e vetme politike e Lelit duket se do të jetë të mbyllë mandatin e tij pa e ndërprerë atë në mes.

Mësohet se kryeministri ka ndërprerë çdo komunikim miqësor me kryebashkiakun. Rama ka kërkuar nga prokuroria të hetojë për firmat që kryebashkiaku ka hedhur, siç ka informacione se po hetohet për disa biseda të ministres së Transportit me kryebashkiakun për investimet në Vlorë.