Basha: Rama po shkatërron provat e vdekjeve, prokuroria të veprojë. Kundërpërgjigjet Ministria e Shendetsisë
Kryetari i Partisë Demokratike, Lulzim Basha ka kërkuar nga Prokuroria të nis sa më shpejt hetimet për numrin real të viktimave me koronavirus. Në një prononcim për mediat, pas takimit me ministrin e Jashtëm të Italisë, Luigi Di Maio, Basha u shpreh se ka të dhëna që tregojnë se kryeministri po ndërhyn te institucionet për të manipuluar provat.
“I kam bërë thirrje Prokurorisë të sekuestrojë urgjentisht provat në morgun e Tiranës. Çfarë pret Prokuroria që nuk nis hetimin, që të manipulohen të dhënat? Pse pret Edi Rama deri nesër për të dalë në konferencë për shtyp përveç se për të falsifikuar dokumentet. Shqipëria, vendi me spitale COVID pa pajisje, medikamente dhe mjete mbrojtëse për mjekët. Përsëris thirrjen drejtuar prokurorisë qeverisë shqiptare të shkojë në morgun e Tiranës të marrë provat. Rama, politikë me vdekjen duke fshehur të dhënat reale të numrit të vdekjeve nga COVID”,- tha kreu i Partisë Demokratike.
Basha u shpreh se dononcimi është bërë nga mjekët që njohin nga afër situatën. “Denoncimi është i ardhur nga personeli me integritet shëndetësor, jo nga PD. Të dhënat janë aty. Fshehja e numrit të viktimave është lajm tronditës. Ky është krim i shumëfishtë. Krimi i parë është se ka ulur në sy të publikut rrezikun. Së dyti, duke fshehur numrin e viktimave, ke fshehur marrjen e përgjegjësisë. Ne kemi kopjet tona me emër dhe mbiemër, datë për datë”’,- tha kreu i PD.
Një ditë më parë në emisionin “Opinon”, kreu i Partisë Demokratike publikoi shifrat që vinin nga mjekët, të cilat tregojnë se shifrat e të vdekurve me koronavirus janë më të mëdha.
Mënjëherë u kundërpërgjigj inistria e Shëndetësisë me anë të zv/ministrtit Albert Nikolla.
Zv/ministri i është përgjigjur kreut të PD, Lulzim Basha se qeveria dhe spitali Infektiv kanë fshehur rreth gjysmën e viktimave nga COVID-19 në Shqipëri. Nikolla thotë se deklarata e djeshme e Bashës është e rrezikshme dhe cënon dinjitetin e mjekëve. Po ashtu ai e fton Bashën që për çdo hamendje të ballafaqohet me autoritetet shëndetësore ndërkohë që MSH do të vijojë komunikimet me korrektësi dhe transparencë.
NJOFTIMI NGA MSH
Ministria e Shëndetësisë dhe Mbrojtjes Sociale solidarizohet me mjekët e vijës së parë të frontit kundër Armikut të Padukshëm, të cilët gjenden qysh mbrëmë nën një akuzë jo vetëm të shëmtuar politike, por edhe të rrezikshme për bluzat e bardha!
Akuza e lëshuar mbrëmë nga Kryetari i Partisë Demokratike, Z. Lulzim Basha, për fshehje të qëllimshme të numrave të qytetarëve që kanë ndërruar jetë, cënon rëndë dinjitetin e mjekëve tanë dhe nxit agresivitetin ndaj tyre, në një kohë kur ata janë aseti më i paçmueshëm që Shqipëria ka në përballjen me pandeminë. Eshtë e paimagjinueshme që ndërkohë që qeveria ka bërë gjithçka për paralizimin e burimeve të dhunës fizike ndaj mjekëve në këto vite, sot opozita ta stimulojë këtë dhunë me një akuzë të tillë e cila fajëson direkt ata, sepse janë mjekët dhe askush tjetër që përcaktojnë shkaqet e fataliteteve në kartelat mjekësore të pacientëve.
Si mund të imagjinohet që të gjithë mjekët tanë të jenë të përfshirë në një manipulim që edhe ta parafytyrosh duhet një papërgjegjshmëri e jashtëzakonshme, ndërkohë që ata kanë përgjegjësi njerëzore, profesionale dhe ligjore për çdo kartelë mjekësore?!
MSHMS u shpreh keqardhjen më të madhe dhe mbështetjen më të fortë mjekëve të Shërbimit Infektiv në Qendrën Spitalore Universitare “Nënë Tereza”, të cilët e ngritën zërin për ta hedhur poshtë me forcën e dinjitetit të tyre akuzën e zotit Basha. Keqardhje sepse pasi janë gjendur në mënyrën më të pamerituar, përballë akuzave të pabazuara, të paargumentuara, dashakeqe në adresë të tyre, sot janë detyruar të bëjnë edhe një deklaratë publike në adresë të politikës, në vend se të paktën të mos sulmohen nga politika në misionin e tyre.
Çdo humbje jete është një dhimbje e madhe jo vetëm për familjarët e të ndjerëve, por edhe për stafet tona mjekësore, të cilat punojnë çdo ditë, orë e pa orë, në luftë me vdekjen, për të shpëtuar çdo jetë njeriu. Por është jonjerëzore që politika të trazojë shpirtrat e lënduar të familjarëve që kanë humbur të dashurit e tyre, duke ngritur një dyshim kaq të rëndë për integritetin e mjekëve tanë.
Ministria e Shëndetësisë dhe Mbrojtjes Sociale e rifton zotin Lulzim Basha dhe këdo tjetër për llogari të tij, që të vijë e të ballafaqojë me autoritetet shëndetësore çdo hamendje, përpara se sa të shpërndajë të tilla tymnaja toksike për shpirtrat e mendjet e qytetarëve.
Për sa na takon, ne do të vazhdojmë të komunikojmë me korrektësi dhe transparencë me qytetarët shqiptarë, siç kemi bërë që nga dita e parë e kësaj pandemie, cdo informacion të raportuar nga strukturat tona, duke kërkuar besim, mirëkuptim, durim në kushtet e kësaj lufte kaq sfiduese për mbarë globin.
Lexoni edhe…
