Meta pas takimit me Varhelyi: Kodin Zgjedhor do ta kthej në Kuvend. Çdo zgjidhje do të vijë nga populli shqiptar

Presidenti Ilir Meta është takuar sot në mbrëmje me Komisionerin për Politikën e Fqinjësisë Europiane dhe Negociatat e Zgjerimit, Oliver Varhelyi. Në mesazhin e publikuar në rrjetet sociale, kreu i shtetit deklaron se ka informuar përfaqësuesin e BE se Kodi Zgjedhor, i miratuar në mënyrë të njëanshme nga PS, do të kthehet sërish në Kuvend.

“Duke u ndalur tek reforma zgjedhore, përcaktuar si kusht themelor për nisjen e negociatave të anëtarësimit, e informova Komisionerin se do të rikthej për rishqyrtim në Kuvend ndryshimet e njëanshme të Kodit Zgjedhor.  Duke mirëkuptuar kërkesën dashamirëse të Grupit të PPE në Parlamentin Europian për t’i dhënë edhe një mundësi Kuvendit një-partiak të tërhiqet nga minimi i procesit zgjedhor, me pasoja të rënda e afatgjata ndaj integrimit europian të Shqipërisë, uroj që pushteti të kthehet tek Marrëveshja konsensuale e 5 Qershorit. E garantova Komisionerin Varhelyi se çdo zgjidhje do të vijë nga populli shqiptar”,- deklaron kreu i shtetit.

Kreu i shtetit shton se “25 Prilli do të jetë një referendum popullor që do t’u japë përgjigjen e merituar të gjithëve atyre që tentojnë të luajnë me të ardhmen europiane të vendit”.

Gjithashtu, Presidentit Meta ka falënderuar Komisionerin e BE për për të gjitha përpjekjet e tij dhe të institucioneve europiane për të mbështetur integrimin europian të Shqipërisë.