Meta, Ramës: Po të pres në përballje. Numërimi mbrapsht për Esadin e Rilindjes ka nisur

Presidenti Ilir Meta ka replikuar me kreun e qeverisë Edi Rama, për deklarata që ky i fundit bëri sot gjatë konferencës për mediat.

Duke e krahasuar me Esad Pashën, kreu i shtetit shprehet se numërimi mbrapsht për Esadin e Rilindjes ka nisur. Ai e paralajmëron se më 25 prill do të jenë 3 milionë shqiptarë që do të votojnë kundër tij. Kreu i shtetit përsërit dhe ftesën për debat publik drejtuar kreut të qeverisë.

“TRE MILIONË ILIRË NË 25 PRILL I KA GATI! Dhe nuk më thua, o trendi buburrec, kur do dalësh në përballje me mua?  Mezi po të pres!”,- shkruan ndër të tjera Presidenti Ilir Meta.

Mesazhi i plotë i kreut të shtetit:

“Esati i Rilindjes, zëdhënësi i armiqve të Kombit Shqiptar, guxoi sërish sot të marrë nëpër gojë Vojo Kushin, duke ofenduar për të disatën herë Dëshmorët e Atdheut, familjarët e tyre, veteranët dhe të gjithë shqiptarët që nderojnë dhe krenohen me vlerat e Luftës Antifashiste Nacionalçlirimtare.

Esati i Rilindjes, pengu i armiqve më të egër të Kombit Shqiptar, që ka nxjerrë në shitje Shqipërinë dhe Kosovën provoi para të gjithë shqiptarëve për të disatën herë se i urren Dëshmorët dhe Heronjtë e Atdheut, si Vojo Kushi, që kanë sakrifikuar gjithçka, duke falur edhe jetën e tyre, për Atdheun!

Esati i Rilindjes, armiku më i egër i socialistëve idealistë, guxoi sot të fyejë edhe simbolin e tyre dhe të Partisë Socialiste, trëndafilin e kuq si gjaku, që prej kohësh e ka zëvendësuar me gjethen e kanabisit dhe barin e egër të Rilindjes, që rritet në llumin e oligarkisë dhe bandave.

Esati i Rilindjes duhet ta ketë të qartë se numërimi mbrapsht për të dhe Sektin pa nder, pa vlera e pa Atdhe që përfaqëson, ka filluar dhe NUK DO NDALET!

TRE MILIONË ILIRË NË 25 PRILL I KA GATI!

Dhe nuk më thua, o trendi buburrec, kur do dalësh në përballje me mua?

Mezi po të pres!”.

https://www.facebook.com/1477517792294489/posts/3438703959509186/