Protesta në Vjenë për Teatrin: Rama-Veliaj, vëllezër në krim. Demokracia në Shqipëri po vdes

Kryesore E Hënë, 8 Qershor 2020 14:29

Protesta për prishjen e Teatrit Kombëtar janë zhvilluar këtë fillim jave edhe në Vjenë. Një grup shqiptarësh janë mbledhur për të protestuar përpara selisë qendrore të fondacionit “Erste Stiftung”.

“Erste Stiftung” është një fondacion, i cili edhe më herët ka mbështetur financiarisht dhe përmes imazhit publik, iniciativa për zhvillimin e demokracisë në Ballkan.

Me pankarta në duar, ku ndër të tjera shkruhet “Rama-Veliaj, vëllezër në krim”, apo “Demokracia në Shqipëri po vdes, mos hesht”, protestuesit kërkojnë që fondacioni, si mbështetës i zërit të shoqërisë civile, të mbajë një qëndrim në lidhje me shembjen e Teatrit Kombëtar, të cilin e konsiderojnë një simbol të trashëgimisë europiane.

Ata shprehen se, me qëllim sensibilimin e opinionit ndërkombëtar për regjimin që është vendosur aktualisht në Shqipëri, do të vijojnë protestat e tyre edhe në ditët në vijim, përpara organizatave të tjera joqeveritare dhe ndërkombëtare.